Heqiqet.Az » siyaset » Xalqımız daim şəhidlərin əziz xatirəsini ehtiramla yad edir


Xalqımız daim şəhidlərin əziz xatirəsini ehtiramla yad edir

19-01-2023, 23:30
Çap et
20 Yanvar hadisələri nəticəsində Azərbaycanda sovet imperiyası özünün bütün mənəvi və sosial dayaqlarını itirdi: “Baş vermiş hadisələr dünya azərbaycanlıların təşkilatlanmasına səbəb oldu. Dünya azərbaycanlıları ilk dəfə olaraq milli faciəmizin tanıdılması naminə yaşadıqları müxtəlif ölkələrdə təşkilatlanmağa başladılar. Sözsüz ki, qanlı Yanvar hadisələri Azərbaycan milli kimliyinin formalaşmasına təsir göstərib. Faciədən sonra milli azadlıq hərəkatı tam siyasi reallığa çevrilib, dönməz xarakter alıb, xalq öz gələcəyini yalnız müstəqil Azərbaycanda görüb.
20-ci əsrin sonuncu on illiyinin ən qanlı səhifələrindən olan 20 yanvar faciəsi tək Azərbaycanın deyil, dünya tarixinin qanlı səhifələrindəndir.
Bu il həmin faciədən 33 il keçir. Azərbaycan xalqı 33 ildir ki, Sovet rejiminin xalqımıza qarşı törətdiyi qanlı 20 Yanvar faciəsini qeyd edir. 1990-cı ildə, yanvarın 19-dan 20-ə keçən gecə sovet ordusu xalqımızın gözünü qorxutmaq, milli azadlıq, müstəqillik əzmini qırmaq üçün dinc insanları vəhşicəsinə qətlə yetirdi.
Bu, qəsdən törədilmiş hərbi cinayət idi. Əvvəlcədən fövqəladə vəziyyət elan edilmədən, sovet ordusu Azərbaycana qarşı hərbi əməlliyatlara başladı. Faciə zamanı 137 nəfər öldürüldü, 744 nəfər ağır xəsarət aldı, 841 nəfər isə qanunsuz olaraq həbs edildi. Sovet ordusunun əməliyyatları nəticəsində 200 mənzil, ev, şəxsi və dövlət əmlakı dağıdıldı.
20 yanvar hadisələri əvvəlcədən planlaşdırılan və xalqımızın azadlıq ruhunu, istiqlaliyyəti uğrunda apardığı mübarizəni sındırmaq məqsədi ilə törədilən qanlı cinayətdir. Ancaq bu vəhşilik belə, xalqımızın azadlıq ruhunu və müstəqillik uğrunda apardığı mübarizəsini dayandıra, qıra bilmədi. Əksinə bu faciədən sonra xalqımız daha da sıx birləşərək azadlıq arzusunu reallığa çevirdi.
Təbii ki, həmin dövrdə insanlığa qarşı törədilən bu qanlı cinayəti beyəlxalq hüquq müstəvisinə çıxarmaq mümkünsüz idi.
Ulu öndər Heydər Əliyev böyük riskə gedərək Sovet rejiminin xalqımıza qarşı törətdiyi bu vəhşiliyi dünya ictimaiyyətinin diqqətinə çatdırdı. Ulu öndər Heydər Əliyevbütün təhlükələrə baxmayaraq, yanvarın 21-də Azərbaycanın Moskvadakı Daimi Nümayəndəliyində mətbuat konfransı keçirərək bu qanlı faciənin təşkilatçılarını ittiham edib və insanlara qarşı törədilmiş bu cinayəti pisləyib. Bununla da Ulu öndər Heydər Əliyev xalqımızın başına gətirilən qanlı cinayətin bütün dünyaya yayılması üçün geniş bir qapı açmış olub.
Ulu öndərin o dövrdəki mərdliyini bu gün onun layiqli davamçısı, Ali Baş Komandan İlham Əliyev davam etdirir. Cənab Prezident İlham Əliyev 44 günlük Vətən müharibəsində bütün təzyiqlərə təkbaşına sinə gərərək ölkəmizin ərazi bütövlüyünü bərpa etdi və 30 illik işğala son qoydu. İki ildir ki, şəhidlərimizin məzarlarını qalib ölkənin vətəndaşları kimi ziyarət edirik. 44 günlük Vətən müharibəsində tək torpaqlarımız işğaldan azad olunmadı, həmçinin müstəqilliyimiz və ərazi bütövlüyümüz uğrunda canlarından keçən şəhidlərimizin də intiqamı alındı. Azərbaycan xalqı heç zaman öz qəhrəman oğul və qızlarını unutmur. 1990-cı ilin yanvarında Azərbaycanın azadlığı və müstəqilliyi uğrunda zirehli texnikanın qarşısına əliyalın çıxan 20 yanvar şəhidləri də daim qəlbimizdə yaşayacaq və xalqımız daim onların əziz xatirəsini ehtiramla yad edəcək.
Dövlət başçisinin 19 yanvar 2006-cı il tarixli “20 Yanvar şəhidinin ailəsi üçün Azərbaycan Respublikası Prezidentinin təqaüdünün təsis edilməsi haqqında” Fərman imzalanıb. Onların uyuduğu Şəhidlər Xiyabanında təmir və yenidənqurma işləri ilə yanaşı, Bakının Yasamal rayonundakı “20 Yanvar” dairəsində, Həsən bəy Zərdabi və Müzəffər Həsənov küçələrinin kəsişməsində Qanlı Yanvar şəhidlərinin xatirəsinə memorial abidə kompleksi ucaldılıb.
20 yanvar şəhidlərinin uyuduğu Şəhidlər Xiyabanı Azərbaycan xalqının müqəddəs, milli dəyərlər naminə bir araya gəldiyi məkanına çevrilib.

İskəndərova Kəmalə Osman qızı,
ADPU-nun Analitik və üzvü kimya kafedrasının dosenti.
19 yanvar 2023-cü il
Reytinq: