Şahmar Ələkbərovun xatirəsi yad edildi

Azərbaycanın Xalq artisti, kinoaktyor, kinorejissor Şahmar Ələkbərov (1943-1992) deyirdi: "Bizim peşəmizdə istedadla yanaşı, nəciblik, xeyirxahlıq, tərbiyə, mədəniyyət və qayğıkeşlik kimi sadə insani keyfiyyətlər də vacibdir". Dostları, həmkarları və doğmaları qeyd edir ki, Şahmar Ələkbərov bu keyfiyyətlərin hamısına malik idi.
2023-cü il avqustun 23-də Azərbaycanın Xalq artisti, kinoaktyor, kinorejissor Şahmar Ələkbərovun anadan olmasından 80 il ötür.
Bununla əlaqədar olaraq görkəmli mədəniyyət və incəsənət xadimləri, Şahmar Ələkbərovun doğmaları və yaxımları İkinci Fəxri Xiyabanı ziyarət edərək Azərbaycanın Xalq artistinin xatirəsini yad ediblər.
Tədbir iştirakçıları söhbətlərində Şahmar Ələkbərovun yaradıcılıq fəaliyyətini səmimiyyətlə bəhs edərək şübhəsiz, onun yüksək insani keyfiyyətlərini yada salıblar.
Tədbirdə çıxış edən Azərbaycanın mədəniyyət nazirinin müavini Murad Hüseynov Şahmar Ələkbərovun möhtəşəm aktyor və rejissor olduğunu və özündən sonra böyük yaradıcılıq irsi buraxdığını qeyd edib.
Dövlət Film Fondunun direktoru, Azərbaycanın əməkdar incəsənət xadimi, kinorejissor Cəmil Quliyev Şahmar Ələkbərovun parlaq şəxsiyyət olduğunu və bu gün onun doğmaları, həmkarları və dostlarının bu şəxsiyyətin nuruna toplaşdığını vurğulayıb.
Tanınmış kiorejissor, Azərbaycanın Xalq artisti Oqtay Mirqasımovun sözlərinə görə, Şahmar Ələkbərovun vəfatından uzun illər keçsə də, onun xatirəsi hələ də canlı olaraq qalır.
Teatr və kino aktyoru, Şuşa Dövlət Musiqili Dram Teatrının baş rejissoru, Azərbaycanın əməkdar artisti Loğman Kərimov bildirib ki, Şahmar Ələkbərovu xatırlayanda insanın qəlbindən sanki daş asılır.
Həmçinin tanınmış kinorejissor, Azərbaycanın Xalq artisti Vaqif Mustafayev, Azərbaycanın Xalq artisti, tanınmış aktyor Rafiq Əzimov, Azərbaycanın Xalq artisti, aktyor və rejissor Əbdüləhəd Mahmudov (Şeyx Əbdül), Azərbaycanın Xalq artistləri, aktrisalar Həmidə Ömərova və Xalidə Quliyeva, tanınmış kino operatoru, Azərbaycanın əməkdar incəsənət xadimi Kənan Məmmədov da Şahmar Ələkbərov barəsində xatirələrini bölüşüblər.
Qeyd edək ki, Şahmar Ələkbərov 23 avqust 1943-cü ildə Kirovabad (indiki Gəncə) şəhərində anadan olub. Şahmarın doqquz yaşı olanda ailə Bakıya köçüb. O Teatr İnstitutunun (indiki Azərbaycan Mədəniyyət və İncəsənət Universiteti) aktyorluq fakultəsində təhsil alıb. 3-cü kursdan Azərbaycan Dövlət Dram Teatrının (indiki Azərbaycan Dövlət Akademik Milli Dram Teatrı) səhnəsində yer alıb. Qısa zamanda rejissor Adil İsgəndərov tərəfindən Cəfər Cabbarlı adına "Azərbaycanfilm" kinostudiyasında yaratmış olduğu "Kino aktyorluğu" studiyasına dəvət alıb.
Şahmar Ələkbərov "Azərbaycanfilm" kinostudiyasında özünü istedadlı aktyor və rejissor kimi göstərib, eləcə də filmlər səsləndirib. Onun ifa etdiyi məşhur rollar arasında Qəzənfər ("Yeddi oğul istərəm"), İman ("Axırıncı aşırım"), Arif ("Həyat bizi sınayır"), Azad ("Bakıda küləklər əsir"), Qatır Məmməd ("Gəncəbasarlı qisasçı"), Cavidan ("Babək"), İbrahim ("Atları yəhərləyin") obrazları var.
1987-ci ildə Şahmar Ələkbərov (Gülbəniz Əzimzadə ilə birlikdə) özünün ilk "İmtahan" filmini çəkib. O həmçinin "Qəzəlxan" və "Sahilsiz gecə" filmlərini də çəkib.
Aktyor 1992-ci il avqustun 12-də uzun sürən xəstəlikdən sonra 49 yaşında vəfat edib.