BMT Əfqanıstanda aclıq böhranının dərinləşəcəyi barədə xəbərdarlıq edib

BMT-nin Humanitar Məsələlərin Koordinasiyası İdarəsi (OCHA) humanitar tərəfdaşlarla əməkdaşlıq çərçivəsində Əfqanıstan üçün 2026-cı il üzrə Humanitar Tələbatlar və Cavab Tədbirləri Planını işə salıb. Təşkilat bildirib ki, planın məqsədi əhalinin təxirəsalınmaz ehtiyaclarını operativ şəkildə təmin etmək və ölkədə humanitar böhranın daha da dərinləşməsinin qarşısını almaqdır.

OCHA-nın bildirdiyinə görə, Əfqanıstan Sudan və Yəməndən sonra dünyada ən böyük humanitar böhranlardan birini yaşamaqda davam edir və proqnozlara görə, 2026-cı ildə ölkə əhalisinin təxminən yarısını təşkil edən 21,9 milyon nəfər humanitar yardıma ehtiyac duyacaq.

“Humanitar ehtiyacların əsas səbəbi ərzaq təhlükəsizliyinin qeyri-sabitliyidir. Təxminən 17,4 milyon nəfərin böhran və ya daha ağır səviyyədə ərzaq çatışmazlığı ilə üzləşəcəyi, 4,7 milyon nəfərin isə fövqəladə şəraitdə aclıq yaşayacağı gözlənilir”, - deyə hesabatda qeyd olunur.

Təşkilat quraqlığı, iqlim dəyişikliklərini, dolanışıq vasitələrinin itirilməsini və əfqan miqrantların kütləvi geri qayıdışını böhranı dərinləşdirən əsas amillər kimi müəyyən edib və qeyd edib ki, fövqəladə səviyyədə aclıq halları ötən illə müqayisədə 50 faizdən çox artıb.

Büdcəsi 1,71 milyard dollar həcmində nəzərdə tutulan plan 17,5 milyon nəfərə yardım göstərilməsinə yönəlib. Plan çərçivəsində quraqlıq, qaçqınların kütləvi geri qayıdışı, xəstəliklərin yayılması, zəlzələlərin nəticələri və digər təbii fəlakətlərdən ən çox zərər çəkmiş bölgələrə xüsusi diqqət yetiriləcək.