2 nömrəli Uşaq-Gənclər İnkişaf Mərkəzi Xətai Sənət Mərkəzində 20 Yanvar faciəsinə həsr olunmuş sərgi keçirdi

16 yanvar 2019-cu il tarixdə Xətai Sənət Mərkəzində 2 nömrəli Uşaq-Gənclər İnkişaf Mərkəzinin təşkilatçılığı, dərnək rəhbərləri Hüseynbala Qasımov, Esmira Rüstəmova və Firəngiz Quliyevanın təşəbbüsü ilə «Gənc tərtibatçı rəssamlar» və «Aplikasiya və dekorativ rəsm» dərnəkləri üzvlərinin 20 Yanvar faciəsinə həsr olunmuş sərgisi keçirildi. Əvvəlcə 20 Yanvar şəhidlərinin xatirəsi bir dəqiqəlik sükutla yad edildi.
Mərkəzin direktor müavini Həsən Qaralov tədbiri açıq elan etdi və Mərkəzin direktoru Əminə Musayevanın tövsiyələrini, faciə ilə bağlı fikirlərini iştirakçıların diqqətinə çatdırdı. Sonra 20 Yanvar faciəsi haqqında uşaqlara ətraflı məlumat verdi, vurğuladı ki, xalqımızın yaddaş tarixində bu cür qanlı hadisələr dəfələrlə baş verib, Vətən ağrılarımız indiyədək unudulmur. Həmçinin, qeyt etdi ki, bu tədbir geniş ictimai əhəmiyyət kəsb edir. Məhz bu tədbirin keçirilməsində də əsas məqsəd yetişən gənc və yeniyetmə nəslin 20 Yanvar faciəsinə münasibətinin ifadə tərzlərinə diqqət çəkməkdir. Bu əsaslara uyğun olaraq dərnək üzvlərinin rəsmlərində əks olunan faciə bir daha göstərir ki, 20 Yanvar xalqımızın faciə yaddaşıdır, tarix boyu unudulmazdır.
Daha sonra tədbirin qonağı, ağsaqqal Aftandil Nəbiyev çıxış edərək 20 Yanvar faciəsi haqqında xatirələrindən danışdı. Aynur Əliyevanın rəhbərlik etdiyi “Bədii qiraət” dərnəyinin üzvləri şəhidlərə həsr olunmş şeirlər söylədilər. Tədbirdə Mərkəzin şöbə müdirləri, dərnək rəhbərləri, valideynlər və digər qonaqlar iştirak edirdi. Qonaqlar dərnək üzvlərinin çəkdikləri rəsmlərlə tanış oldular, bu rəsmlərdə ifadə olunan faciə və 20 Yanvar dəhşətlərini gördülər.
Sonda dərnək üzvlərinin mükafatlandırma mərasimi də oldu, gənc rəssamlara diplomlar təqdim edildi.