Mehriban xanımın çoxşaxəli fəaliyyəti onu bütün dünyada tanıtmışdır

Azərbaycan Respublikasının Prezidenti İlham Əliyevin dövlət başçısı kimi bütün fəaliyyəti dövründə Mehriban xanım Əliyeva yalnız birinci xanım kimi deyil, həm də, böyük təşkilatçı, ən gözəl humanitar, mədəni, sosial ideyaların, layihələrin təşəbbüsçüsü kimi öz dəst-xətti ilə milyonların sevimlisinə çevrilmişdir. İlham Əliyev-Mehriban Əliyeva tendemi qoşa qanad kimi Azərbaycanın üzərində açılaraq ölkəmizin təhlükələrdən qorunaraq davamlı inkişafını təmin etmişdir.
Mehriban xanım Əliyevanın adı müasir Azərbaycan tarixinin demək olar ki, hər günündə, hər bir səhifəsindədir. Mehriban xanımın çoxşaxəli fəaliyyəti onun şəxsiyyətini təkcə, region ölkələrində deyil, bütün dünyada tanıtmışdır.
Mehriban xanım Əliyevanın Birinci vitse-prezident kimi fəaliyyəti dövlət aparatında operativliyin artırılmasına, funksionallığın təmin olunmasına, böyük ölçüdə kadr islahatlarına öz töhfəsini vermişdir. Bürokratik aparatın sağlamlaşdırılması, yüksək intellektli gənclərin dövlət aparatına işə cəlb olunması və bu işlərin artıq, müsbət nəticələri hər kəs tərəfindən qəbul edilən reallıqlardır.
Mehriban xanımın fəaliyyət sferası o qədər genişdir ki, bütün bu işlərin bir insan tərəfindən yüksək peşəkarlıqla həyata keçirilməsi, koordinasiya edilməsi heyrət doğura bilir. Lakin, Mehriban xanım Əliyevanın yüksək intellekti, həyat təcrübəsi, böyük mədəniyyət daşıyıcısı olması bütün bu taleyüklü məsələlərin öhdəsindən gəlməsinə imkan verir.
Müharibə günlərində Mehriban xanım öz çıxışları, müraciətləri ilə Azərbaycan xalqının, o cümlədən, ordumuzun yüksək əhval-ruhiyyədə olması üçün çalışdı. Həmçinin, Ermənistanın Azərbaycan şəhərlərini bombalaması ilə çoxsaylı insan tələfatı və dağıntılarla müşayiət olunan fəsadlar Mehriban xanımın həssaslıq göstərdiyi əsas məsələlərdən idi.
Azərbaycan xalqı son onilliklərdə Mehriban xanım Əliyevanın bir çox sahələr üzrə uğurlu fəaliyyətinə şahidlik edib. Keçən ilin payızında işğal altındakı torpaqlarımızın azad edilməsi məqsədilə Ali Baş Komandanın rəhbərliyi ilə Azərbaycan Silahlı Qüvvələrinin apardığı müqəddəs savaş zamanı xalqımız Mehriban xanımın yeni keyfiyyətlərini kəşf etdi.
Mübahisəsiz demək olar ki, Mehriban xanım azad edilən ərazilərə, Xudafərin körpüsünə ilk ayaq basan Azərbaycan qadını oldu. Torpaqlarımız işğaldan azad olunduqdan sonra ilk günlərdən – hələ ərazilərdə təhlükənin qaldığı şəraitdə Mehriban xanım Əliyeva Ali Baş Komandan İlham Əliyevlə birlikdə hərbi geyim geyinərək həmin ərazilərə səfər etdi.
Eyni nümunəni biz Prezident İlham Əliyevin və Mehriban xanımın Qarabağa səfərlərində də müşahidə etdik. 28 ildən sonra Mehriban xanımın qədəmlərində doğma torpaqlarımızda minlərlə qarabağlı xanımların ayaqları gəzdi-dolaşdı. Bu əsl şücaət örnəyi idi.
Bu gün Azərbaycan Respublikasının Birinci vitse-prezidenti, ölkəmizin birinci xanımı Mehriban Əliyevanın doğum günüdür.
Bu əlamətdar gün münasibətilə hörmətli Mehriban xanım Əliyevanı təbrik edir, ölkəmizin çiçəklənməsi, xalqımızın xoşbəxt rifahı naminə göstərdiyi fəaliyyətində uğurlar arzulayıram!

Niyaməddin Məmmmədov,
Lənkəran şəhər, Zövlə kənd Bələdiyyəsinin sədri,"İlin fəal bələdiyyə sədri", "Vətənpərvər bələdiyyə sədri" media mükafatı laureatı
***
Redaksiyadan:
Qeyd edək ki, Lənkəran şəhər, Zövlə kənd Bələdiyyəsinin sədri, "İlin fəal bələdiyyə sədri", "Vətənpərvər bələdiyyə sədri" media mükafatı laureatı Niyaməddin Məmmmədovun "HEYDƏR ƏLİYEV FONDU BİZİMLƏ"adlı kitabı işıq üzü gördü. Eyni zamanda Niyaməddin Məmmədov "Uğur" media mükafatına layiq görüldüyünə görə onu kollektivimiz adından təbrik edirik!