Netanyahu: HƏMAS-ı tərk-silah etmək girovların qaytarılmasından sonra növbəti addımdır

İsrailin Baş naziri Benyamin Netanyahu bildirib ki, Fələstinin HƏMAS hərəkatının tərk-silah edilməsi girovların qaytarılmasından sonra sülh prosesində növbəti mühüm mərhələ olacaq.

Netanyahu bu sözləri CBS telekanalına müsahibəsində deyib. O vurğulayıb ki, ilk növbədə HƏMAS silahlarını yerə qoymalı, ikinci olaraq isə Qəzzada silah istehsalı müəssisələrinin olmamasına əmin olunmalıdır. Baş nazir əlavə edib ki, Qəzzaya heç bir silahın qaçaqmalçılıq yolu ilə gətirilməsinə imkan verilməməlidir və bu tədbirlər demilitarizasiya məqsədi daşıyır.

Netanyahu HƏMAS bu şərtləri yerinə yetirməzsə, “əsl xaosun başlayacağını” bildirib. O, həmçinin ümid etdiyini, bunun baş verməyəcəyini və məsələnin sülh yolu ilə həll oluna biləcəyini qeyd edib.

Xatırladaq ki, bundan əvvəl ABŞ Prezidenti Donald Tramp da HƏMAS arsenallarından əl çəkməzsə, Amerika tərəfinin hərəkatı tərk-silah etmək vəzifəsini öz üzərinə götürə biləcəyini bəyan etmişdi.