28 May – Müstəqillik Günü xalqımız üçün yalnız tarixi bayram deyil, həm də milli qürur və dövlətçilik rəmzidir

Bu gün hər bir azərbaycanlı üçün azadlığın, milli həmrəyliyin və gələcəyə inamın təcəssümüdür. Azərbaycan xalqı öz müstəqilliyini qorumağa və daha da möhkəmləndirməyə daim qadir olduğunu tarix qarşısında sübut etmişdir.
28 May Azərbaycan xalqının tarixində ən əlamətdar və qürurverici günlərdən biridir. Bu tarix xalqımızın azadlıq, müstəqillik və dövlətçilik arzularının gerçəkləşdiyi gün kimi milli yaddaşımıza həkk olunmuşdur. 1918-ci il mayın 28-də Azərbaycan xalqı Şərqdə ilk parlamentli demokratik respublikanın – Azərbaycan Xalq Cümhuriyyətinin yaradılması elan edilməsi ilə öz dövlət müstəqilliyini dünyaya bəyan etmişdir. Bu hadisə yalnız Azərbaycanın deyil, bütövlükdə müsəlman Şərqinin siyasi tarixində yeni bir mərhələnin başlanğıcı olmuşdur.

Birinci dünya müharibəsindən sonra regionda baş verən mürəkkəb siyasi proseslər fonunda Azərbaycan xalqının qabaqcıl ziyalıları və siyasi xadimləri milli dövlət quruculuğu missiyasını üzərlərinə götürdülər. Məmməd Əmin Rəsulzadə, Fətəli xan Xoyski, Əlimərdan bəy Topçubaşov və digər görkəmli şəxsiyyətlərin rəhbərliyi ilə yaradılan Azərbaycan Xalq Cümhuriyyəti qısa müddətdə mühüm dövlətçilik ənənələri formalaşdırdı. Cəmi 23 ay fəaliyyət göstərməsinə baxmayaraq, Cümhuriyyət demokratik idarəçilik prinsiplərinə əsaslanan mühüm islahatlar həyata keçirdi.

Azərbaycan Xalq Cümhuriyyəti dövründə parlament yaradıldı, dövlət atributları qəbul edildi, milli ordu formalaşdırıldı, təhsil və mədəniyyət sahəsində mühüm addımlar atıldı. Qadınlara seçki hüququnun verilməsi həmin dövr üçün böyük demokratik yenilik hesab olunurdu. Bu addım bir çox Avropa ölkələrindən belə əvvəl atılmışdı və Azərbaycan dövlətinin demokratik mahiyyətini nümayiş etdirirdi.

1920-ci ildə Cümhuriyyətin süqut etməsinə baxmayaraq, Azərbaycan xalqının müstəqillik ideyası heç vaxt sarsılmadı. Xalqımız uzun illər ərzində azadlıq arzusu ilə yaşadı və nəhayət, 1991-ci ildə dövlət müstəqilliyini yenidən bərpa etdi. Müasir müstəqil Azərbaycan Respublikası məhz Azərbaycan Xalq Cümhuriyyətinin siyasi və mənəvi varisi hesab olunur.

Bu gün Azərbaycan müstəqil dövlət kimi beynəlxalq aləmdə öz mövqeyini daha da möhkəmləndirir. Dövlətimizin əldə etdiyi siyasi, iqtisadi və hərbi uğurlar müstəqilliyimizin nə qədər böyük dəyər olduğunu bir daha göstərir. Azərbaycanın suverenliyinin və ərazi bütövlüyünün tam təmin olunması isə xalqımızın milli birliyinin və güclü dövlətçilik ənənələrinin nəticəsidir.

Nəsibə Hüseynova
Bakı şəhəri 66 nömrəli tam orta məktəbin direktoru