Buna nə ad vermək olar, cənab ağalar?!

Deyəndə ki, bu ölkənin Qanuna hörmət qoyulmayan ərazilərində hərc-mərclikdir, bizə inanmırlar, elə bilirlər, xaos yaratmaq üçün can atırıq... Bir halda ki, Yasamal rayonunun Yeni Yasamal-1, Xiyabani küçəsində yerləşən 12-ci binanın arxa hissəsində, «Qismət» şadlıq sarayına gedən yolun sol tərəfində vəziyyət «ruscadır», deməli, həqiqət özünü tam mənada əks etdirir. Bəs bu ərazidə nə baş verir? Hə, əsas məsələ də elə bunu ağartmaqdır. Ərz olunur ki, adıçəkilən ərazidə bir vaxtlar Laçın rayonundan qaçqın düşmüş İlqar adlı bir şəxs ailəsi ilə birlikdə yaşayırmış və həmin ərazini də göz-bəbəyi kimi qoruyurmuş: yəni burada sanki Laçını təsəvvür edirmiş, ona görə də buranın bəzəyi olan ağacları hər gün əzizləyirmiş. Lakin yazıq Vətən həsrəti çəkə-çəkə vəfat edən kimi burada vəziyyət sözün həqiqi mənasında dəyişib, kişinin 40-ı çıxmamış Şuşanın Yol İdarəsinin rəisi Əbil Əmirovun bu sahəyə gözü düşüb, burada moyka tikdirmək qərarına gəlib. Elə bu minvalla da burada təbiət gözəlliyini əks etdirən ağacları kəsdirib, arzusunu reallaşdırıb. Deyilənə görə, Yasamal Rayon İcra Hakimiyyətinin göstərişi ilə həmin tikinti sökülüb, başçı İbrahim Mehdiyev də vəziyyətlə yerində tanış olub. Lakin söküntüdən iki-üç gün sonra 19 saylı Mənzil İstismar Sahəsinin rəisi qəfildən meydana çıxıb və bildirib ki, bu rayonun ağası odur, kimin «duxu» var, ona bir kəlmə desin. Bu əda ilə də moykanın yenidən tikintisinə icazə verib. Və işlər sürətlənib. Hazırda həmin ərazidə yaşayan sakinlər səs-küy və evlərinin altını basan sudan dad-aman edirlər. Bud ad-amanın da əsas məqsədlərindən biri budur ki, moykanın çirkli suları sakinlərin yaşadıqları binanın zirzəmisinə axır, çirkab sular xəstəlik mənbəyinə çevrilir. Üstəlik, ağcaqanadların da bir tərəfdən peyda olması sakinləri hay-küy salmağa məcbur edir. Belə deyək, hazırda həmin binanın zirzəmisi çirkab sularının əsarətindədir. Fəqət, türklər demiş, bu, kimin «umrunda». Alan alıb, satan satıb və tikən də tikir. Əziyyəti çəkən də sadə kütlədir. Yəni orada yaşayan köməksiz sakinlər.
Təkrar demək bəlkə də məntiqə daha uyğun olar, çünki onsuz da həqiqət sözə qulaq verən yoxdur. Mərhum Heydər Əliyev dəfələrlə xəbərdarlıq edib ki, bir ağac kəsən bilsin ki, mənim bir qolumu kəsir, lakin özbaşına məmurlar bu boyda nəhəng sözə də əhəmiyyət vermirlər. Elə ölkə rəhbəri İlham Əliyevin də ağacəkmə kampaniyasında şəxsən iştirak etməsi ağacların kəsilməsinə qarşı yönələn ciddi siqnaldır. Ancaq onun da bu jestləri faydasız qalır. O səbəbdən ki, Yasamal Rayon İcra Hakimiyyətinin başçısı İbrahim Mehdiyev rayon ərazisində yaşanan bu cür mənfi hallara ya göz yumur, ya da baş verənlərdən xəbər tuta bilmir. Bu da istər-istəməz acı hallara yol açır, insanlarda ölkə prezidentinin apardığı siyasətə ikrah doğurur. İnanmırıq ki, cənab Meydiyev belə bir halın ajiotaj yaratması marağındadır. O zaman çox yaxşı olardı ki, o, rayon rəhbəri kimi sakinlərin fəryadına səs versin.
Həmçinin, Bakı Şəhər İcra Hakimiyyəti də bu məsələdə Yasamal RİH-ni qədər məsuliyyət daşıyır. Çünki Bakı şəhərinin ekoloji sağlamlıq amili bu strukturun da məsuliyyətini daşıdığı məsələdir. Bəs nə baş verir ki, aidiyyəti orqan rayon ərazilərində baş verənlərə sadəcə susmaqla reaksiya verir?!
İndi də Şuşa Yo İdarəsinin rəisinin adıçəkilən ünvanda yol verdiyi neqativ halla bağlı bir-iki kəlmə dınqıldadaq. O da bilməlidir ki, rayonun təbiət və ekoloji sağlamlıq xarakteri dövlətin əsas prioritetidir. Əgər camaatın səs-küyünə reaksiya vermirsə və rayonun tin göbəyində səs-küylə böyük bir obyekt inşa etdirirsə, deməli bu məsələ onun vecinə deyil. Bu da açıq-aşkar məmur özbaşınalığı deməkdir. Cənab İlham Əliyev də ölkədə məmur özbaşınalığına qarşı hər gün demək olar, mübarizə aparır. Və cənab rəisin ölkə prezidentinin bu mübarizəsinə qarşı çıxması onun özbaşınalığına dəlalət edir. Əminik ki, bəhs olunan məsələ həm aidiyyəti orqanların, həm də cavabdeh şəxs kimi yol rəisinin beyninə batacaq. Əks halda, dövlətə, onun apardığı siyasətə qarşı yönələn mənfi reaksiyalara görə məsuliyyət birbaşa onların öz üzərlərinə düşəcək.
Bizdən deməkdir, gerisi yol rəisinin işidir. Qaldı sakinlərin haqlı narazılığına, onların da köməyinə qoy İbrahim Mehdiyev, cənab Hacıbala Abutalıbov və bir də arada gəzən vicdan haqqı çatsın...
Məsələyə yenidən münasibət bildirəcəyik. Qarşı tərəflərin də mövqeyini dərc etməyə hazırıq. Çünki biz Qanunun aliliyini əlimizdə əsas tutur, dövlət prioritetlərini təbliğ edirik.