Robert Sekuta: Azərbaycan tolerantlıq nümunəsidir

"Ölkəyə gələndən Azərbaycanın dünyaya təqdim edə biləcəyi bir sıra məqamlarla tanış olmuşam. Bunlardan biri tolerantlıq və müxtəlif dinlərə mənsub insanların bir yerdə və qarşılıqlı hörmətlə yaşamasının qədim tarixə malik olmasıdır." Bunu ABŞ-ın Azərbaycandakı səfiri Robert Sekuta müqəddəs Ramazan ayı münasibətilə öz iqamətgahında iftar zamanı deyib.
Onun sözlərinə görə, Birləşmiş Ştatlarda təxminən 2,6 milyon müsəlman yaşayır və 2030-cu ilə qədər onların sayının 6,2 milyona qədər artması gözlənilir ki, bu da əhalinin təxminən iki faizini təşkil edəcəkdir.
"Quran dini mənsubiyyətindən asılı olmayaraq hər bir insana qarşı sevgi və şəfqət hissi aşılayır. Biz yalnız özümüzdə bu keyfiyyətləri aşılamaqla birgə irəliləyə və qarışıq dünyamızda bəlaların öhdəsindən gələ bilərik", - deyə səfir qeyd edib.