İES-dəki qəzadan sonra Bakı aeroportunda vəziyyət necədir?

Mingəçevir İES-də baş vermiş qəza Heydər Əliyev adına Beynəlxalq Hava Limanının işinə təsir etməyib. Bunu AZAL-ın mətbuat xidmətinin rəhbəri Paşa Kəsəmənski deyib.
Mətbuat xidməti rəhbərinin sözlərinə görə, aeroport bütün gecə adi rejimdə fəaliyyətini davam etdirib.
P.Kəsəmənski deyib: "Qəza aeroportun işinə təsir etməyib. Hadisə baş verən an dərhal qəza generatorları işə düşüb. Bütün gecə aeroport adi iş rejimində fasiləsiz işləyib".
Xatırladaq ki, iyulun 2-dən 3-nə keçən gecə hava şəraitinin kəskin dərəcədə dəyişməsi, temperaturun yüksək həddə çatması nəticəsində əhalinin elektrik enerjisindən həddən artıq istifadə etməsi ilə əlaqədar Mingəçevir İES-in yarımstansiyasında cərəyan transformatoru sıradan çıxıb.