» » Bəzi vətəndaşlar 190 manatı niyə ala bilmir? - ARAŞDIRMA


Bəzi vətəndaşlar 190 manatı niyə ala bilmir? - ARAŞDIRMA

25-07-2020, 13:48
Çap et
Bəzi vətəndaşlar 190 manatı niyə ala bilmir? - ARAŞDIRMA Son günlərdə sosial şəbəkələrdə və xəbər saytlarında karantin dövründə 190 manatlıq birdəfəlik ödəmə alan şəxslərin kartlarının bloklanması və həmin kartlardan pul vəsaitinin geri çəkilməsi ilə bağlı məlumatlar yayılıb.
Elə Ağdam rayonundan məcburi köçkün düşmüş Allahverdi Quliyev də bu cür problemlə qarşılaşıb.
Onun sözlərinə görə, həyat yoldaşına məxsus kartda olan 190 manat vəsait onun xəbəri olmadan hesabdan silinib.
Müsahibimiz deyir ki, 5 nəfərlik ailədə yalnız həyat yoldaşı, Füzuli rayonunda qeydiyyatda olan Əfsanə Abbasova 190 manat birdəfəlik ödəniş alırmış. Ailəsi ilə birlikdə yataqxanada yaşadığını deyən vətəndaş iki ay bu yardımı alsa da, sonuncu ay yolunu gözlədikləri 190 manat onlara gəlib çatmayıb: “Yoldaşım 2 ay ərzində 190 manatlıq birdəfəlik ödənişi aldı. Amma 3-cü ayın pulunu vermədilər. Dedilər ki, sən hazırda xüsusi karantin rejiminin tətbiq olunmadığı Füzuli rayon qeydiyyatındasan. Ona görə də sizə bu pul düşmür. Amma biz Bakıda, yataqxanada yaşayırıq. Neçə dəfə də müraciət etmişik, deyirlər ki, 190 manatlıq birdəfəlik ödəmə sizə düşmür. Gah dedilər ki, karta pul oturub. Pulu gec çıxardığınıza görə həmin vəsait kartdan geri çəkilib. Kartınız bloklanıb dedilər. İndi də deyirlər ki, Füzuli rayonundan olduğuna görə sizə düşmür”.
Allahverdi Quliyev məsələ ilə bağlı aidiyyəti qurumlara müraciət də edib: “Sosial Müdafiə Fonduna da getmişik. Oradan dedilər ki, məsələ ilə bağlı məşğulluq idarəsinə yaxınlaşın. Bura da gəlmişik, deyirlər ki, bizlik deyil, yəqin ki, Füzuli rayonunun qeydiyyatında olduğuna görə pulu ala bilmirsən. Heç bir söz deyən yoxdur. Yuxarı da buraxmırlar, həyətdə qəbul edirlər. Hazırda Bakıda xüsusi karantin rejimidir. Əgər pandemiyaya görə Bakıya bu pul verilirsə, bizə niyə verilmir bu pul? Biz Bakıda yaşayan adamlarıq”.
Məsələ ilə bağlı Əmək və Əhalinin Sosial Müdafiəsi Nazirliyi (ƏƏSMN) yanında Dövlət Məşğulluq Agentliyi ilə əlaqə saxladıq. Qurumun mətbuat katibi Əsmər Nəcməddinqızı bildirdi ki, bu cür hallar vətəndaşların şəxsi məlumatlarını sistemə düzgün daxil etməməsi səbəbindən yaranır: “Üçüncü ay üçün, yəni iyul ayı üçün 190 manat məbləğində birdəfəlik ödəmə verilən zaman vətəndaşın karantin zonasında yaşaması və ya karantin zonasında qeydiyyatda olması nəzərə alınırdı. Bəzi vətəndaşlar qeydiyyatdan keçən zaman öz faktiki yaşayış ünvanlarını ya qeyd etməyiblər və ya məlumatları əskik qeyd ediblər. Buna görə də bəzi vətəndaşlar karantin rayonlarında yaşasalar belə, elektron sistem üzərindən onların faktiki yaşayış ünvanları karantin zonasını əhatə etmədiyi üçün iyul ayının ödənişi həmin şəxslərə şamil olunmayıb”.
Məlumat üçün bildirək ki, Nazirlər Kabineti yanında Operativ Qərargahın sonuncu brifinqində Prezidentin köməkçisi – Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov bildirib ki, 190 manat almış müəyyən sayda şəxs 1 ay müddətində həmin vəsaitdən istifadə etməyib. Bu, insanlara birdəfəlik yardım üçün verilib və həmin vəsait kartdan çıxarılmayıbsa, deməli, həmin şəxslərin bu vəsaitə ehtiyacları olmayıb. “Əgər insan obyektiv səbəbdən, məsələn, xəstəlikdən o vəsaiti götürə bilməyibsə, Əmək və Əhalinin Sosial Müdafiəsi Nazirliyinə müraciət edə bilər” – deyə Prezidentin köməkçisi bildirib.

Həmidağa Məcidov,
Musa Qulammirzəyev
Reytinq: