Hər bir azərbaycanlı üçün əlamətdar bir gün

Bu günlər Müzəffər Ali Baş Komandanın rəhbərliyi ilə Azərbaycan xalqı öz qədim tarixinə şanlı səhifələrini yazır. 44 günlük Vətən müharibəsində 30 illik torpaq həsrətinə son qoyan, regionun lider dövlətinə çevrilən Azərbaycanın səsi bü gün dünyanın güc və beyin mərkəzlərindən, qlobal qərarların verildiyi mühüm platformalardan gəlir.
Öz ərazi bütövlüyünü təmin etmiş Azərbaycan dövləti hazırda geniş quruculuq işlərinə, regionun siyasi-iqtisadi mənzərəsini dəyişəcək böyük layihələrə start verib: Hamımız, bütün xalq inanır ki, uzun illər düşmən tapdağında qalan, öz oğullarının qanı bahasına azad edilən doğma Qarabağımız qısa müddətdə bərpa edilərək dünyaya Azərbaycan xalqının qədim tarixini, mədəniyyətini bir daha nümayiş etdirəcək. Ölkəmizin iqtisadi gücü günbəgün artır, Azərbaycan regionda mühüm siyasi-iqtisadi güc mərkəzinə, böyük dövlətlərin əlaqələndirici platformasına çevrilir. Yerləşdiyi coğrafiyanın düyün nöqtəsi olmaqla Azərbaycan Şərqlə Qərbi birləşdirə bilən nəqliyyat dəhlizlərinin, özündən min kilometrlərlə uzaqda olan dövlətlərin enerji təhlükəsizliyinin qarantına çevrilir. Bütün bunların həyata keçirilməsinin əsasında xalqımızın dəmir iradəsi, onun lideri – möhtərəm cənab Prezident, Ali Baş Komandan İlham Əliyevin dərin zəkası, onun uzaqgörən daxili və xarici siyasəti dayanır”.
Bu gün Azərbaycan güclü iqtisadiyyata, güclü orduya, dünya birliyində güclü mövqeyə sahib olmaqla yanaşı, güclü sosial siyasətə malik olan bir ölkəyə çevrilib. Aparılan siyasətin mərkəzində isə Azərbaycan vətəndaşı, vətəndaş rifahının təminatı prinsipi dayanır və bu prinsip iqtisadi dividentlərin ilk növbədə əhalinin rifahının yaxşılaşdırılmasına yönəldilməsi, əhalinin sosial müdafiəsinin gücləndirilməsi istiqamətində tərəfinizdən ardıcıl addımların atılması ilə də öz təsdiqini tapmaqdadır.
44 günlük Vətən müharibəsi Azərbaycan xalqının, onun müzəffər sərkədəsinin, qalib Azərbaycan əsgərinin rəşadətini bütün dünyaya sübut etdi: “Döyüş meydanlarında, siyasi arenalarda Azərbaycan liderinin dəmir iradəsi, yenilməz rəşadəti düşmənə sarsıdıcı zərbə vurmağa imkan verdi.
Bu gün həm də hamımız üçün, hər bir azərbaycanlı üçün əlamətdar bir gündür. Belə ki, bu gün Azərbaycan Prezidenti, cənab Ali Baş Komandan İlham Əliyevin yubileyi, ad günüdür. Bu münasibətlə onu təbrik edir, ona möhkəm can sağlığı, daşıdığı tarixi missiyada daha böyük uğurla arzulayırıq. Yaşasın Azərbaycan, yaşasın Ali Baş Komandan!

Əsədli Elnur Xeyrul oğlu
Lənkəran rayonu M. Həsənov adına Şilavar kənd tam orta məktəbin direktoru