Azərbaycan İran sərhəddində 3 nəfər saxlanılıb

Azərbaycan sərhəddini pozmağa cəhd göstərən 3 nəfər saxlanılıb. Dövlət Sərhəd Xidmətindən verilən məlumata görə, onlar Biləsuvar kəndi ərazisindəki sərhəd zastavasının xidməti sahəsindən dövlət sərhədini İran istiqamətində pozmağa cəhd göstərib.
Araşdırmalar zamanı məlum olub ki, saxlanılanlardan biri Azərbaycan vətəndaşı Əliyev Rövşən Natiq oğlu 18.09.2015-ci il tarixdə Bakı şəhərində yerləşən “Lion” kafesində baş vermiş qətl hadisəsində şübhəli bilinən və cinayət yerindən qaçmış, əvvəllər məhkum olunmuş Ağayev Niyaməddin Xanhüseyn oğlu və Hətəmov Nurəddin Nurməmməd oğlunu dövlət sərhəddindən qanunsuz keçirmək məqsədi ilə idarə etdiyi avtomaşınla Biləsuvar rayonunun sərhədyanı ərazisinə apararaq köməklik edib.
Dövlət Sərhəd Xidməti əməkdaşlarının sayıqlığı nəticəsində Hətəmov Nurəddin Nurməmməd oğlu, Ağayev Niyaməddin Xanhüseyn oğlu və Əliyev Rövşən Natiq oğlu sərhədyanı ərazidə saxlanılıb.
Hazırda fakt üzrə əməliyyat-istintaq tədbirləri davam etdirilir.