"Elmlər Akademiyası"nın əsas çıxışı bağlandı

Bu gündən “Elmlər Akademiyası”nın əsas girişində böyük təmirə start verildi. Stansiyanın 1-ci vestibülü sərnişinlərin giriş-çıxışı üçün bağlanır.
Qurumun mətbuat xidmətindən verilən məlumata görə, Azərbaycan Respublikası Prezidentinin Bakı Metropoliteninin 2011-2015-ci illərdə inkişafına dair Dövlət Proqramı”nın yerinə yetirilməsi üçün tərtib olunmuş tədbirlər planına uyğun olaraq metropolitenin stansiyalarının yenidən qurulması və müasir avadanlıqlarla (işarəvermə, rabitə, teleidarəetmə, eskalator, ventilyator və s.) təchiz olunması nəzərdə tutulub.
“Elmlər Akademiyası” stansiyasının I vestibülündə quraşdırılmış 3 ədəd ET-3 tipli eskalator istismar müddətini başa vurduğu üçün sərəncama əsasən, müvafiq qaydada dəyişdirilməlidir. Bunun üçün stansiyanın 1-ci vestibülü sərnişinlərin giriş-çıxışı üçün bağlanmalıdır. Bütün bunları nəzərə alaraq “Bakı Metropoliteni” QSC sərnişinlərə xəbərdarlıq edir ki, “Elmlər Akademiyası” stansiyasının I vestibülü 15.04.2016-cı il tarixindən etibarən sərnişinlərin giriş-çıxışı üçün müvəqqəti bağlanacaq. II vestibül (BDU tərəf) isə əvvəlki qaydada sərnişinlərin giriş-çıxışı üçün açıq olacaq.“Bakı Metropoliteni” QSC yaranmış narahatlığa görə sərnişinlərdən üzr istəyir.
Məlumata görə, stansiyada dörd əlavə çıxış inşa olunacaq. Onların hamısı eskalatorla təchiz olunacaq. Yeni çıxış müasir standartlara cavab verən keçid olacaq. Stansiyanın çıxışlardan biri Bakı Dövlət Universitetinin qarşısında (Z.Xəlilov küç), ikincisi Mətbuat prospektində, digər ikisi isə yeni inşa olunan akademik kitabxananın yaxınlığında olacaq. Stansiyanın yeni çıxışları gələn ilə hazır olacağı bildirilib.