Bu il xəstəxanaya zəhərlənmə ilə bağlı 68 uşaq daxil olub

“İntihar məqsədilə sirkə turşusu və dərman preparatlarından zəhərlənmə ümumi toksikoloji müraciətlərin 3 faizini təşkil edir”.
Respublikanın baş toksikoloqu, KTM-in Toksikologiya şöbəsinin müdiri Azər Maqsudov deyib ki, bu rəqəm bütün illərdə 3-4% olur. Onun sözlərinə görə, sirkə turşusundan zəhərlənmə ilə hər ay 5-7 müraciət daxil olur: “Bu il sirkə turşusundan cəmi 8 nəfər ölüb. Onlar xəstəxanaya çox ağır vəziyyətdə gətirilib və həyatlarını xilas etmək mümkün olmayıb. Sirkə turşusundan zəhərlənmə ən çox ailə-məişət münaqişə zəminində baş verən hadisələr nəticəsində olur”.
A. Maqsudov əlavə edib ki, il ərzində mərkəzə zəhərlənmə ilə bağlı 68 uşaq daxil olub. Onlardan 42 nəfəri dərmandan, qalanları isə dəm qazından zəhərlənib: “Ümumilikdə bu ilin yay mövsümündə zəhərli göbələkdən zəhərlənmə ilə bağlı 26 xəstə müraciət edib, onlardan heç biri ölməyib. İlan sancması ilə bağlı isə 114 xəstə müraciət edib”.