"Taliban" yeni liderinin adını açıqladı

"Taliban" hərəkatı yeni liderinin adını açıqlayıb. Hərəkatın bəyanatında Molla Mansurun ABŞ pilotsuz uçan aparatının zərbəsi nəticəsində həlak olduğu təsdiq olunur və yeni liderin Heybətulla Axundzadə təyin edildiyi açıqlanır. Axundzadənin daha əvvəl Molla Mansurun şəriət məhkəmələrinin keçirilməsinə dair müavini olduğu açıqlanıb. Yeni liderin müavinləri isə Kabildə bir sıra ölümcül partlayışlar törədən Siracuddin Xakkani və hərəkatın ötən il öldürülən lideri Molla Ömərin oğlu Məhəmməd Yaqub olacaqlar.
Molla Axtar Mansur "Talibana" 2015-ci ilin iyulunda Molla Ömərin öldürülməsindən sonra başçılıq etməyə başlayıb.
Mansurun təyinatı hərəkatın iki yerə bölünməsinə səbəb olub və nəticədə Mansurun və Ömərin tərəfdaşları arasında toqquşmalar qeydə alınıb.
Taliblərin başçısının ölümünə səbəb olan zərbə mayın 21 Əfqanıstan sərhədi yaxınlığında endirilib. Əməliyyatda bir neçə Amerika pilotsuz uçan aparatı iştirak edib. Onların hədəfi silahlıların içərisində olduğu ehtimal edilən avtomobil olub. Bir müddət sonra Əfqanıstanın baş naziri Abdulla Abdulla "Taliban" hərəkatının liderinin öldürüldüyü ehtimalını təsdiq edib.
ABŞ dövlət katibi Con Kerri artıq Axtar Mənsurun ölümünü şərh edib. "ABŞ aviazərbələri nəticəsində öldüyü ehtimal edilən "Taliban" qruplaşmasının lideri Axtar Mənsur ABŞ hərbçiləri və həmçinin bir sıra ölkə sakinləri üçün təhlükəli idi" - deyə Kerri bildirib.