GCCA aqrar biznesin potensialını genişləndirməkdə Azərbaycana kömək edəcək

Beynəlxalq Soyuq Logistika Assosiasiyası (Global Cold Chain Alliance, GCCA) aqrobiznesin potensialını genişləndirməkdə və Azərbaycan kənd təsərrüfatı məhsullarının yerli və xarici bazarlara çıxarılmasında Azərbaycana kömək etməyə hazırdır.
Bunu Bakıda jurnalistlərə GCCA-nın beynəlxalq proqramlar üzrə vitse-prezidenti Riçard Treysi deyib.
O, Azərbaycanın aqrar məhsullarının digər ölkələrə ixracı imkanına toxunaraq deyib ki, Azərbaycan dünyada ən dadlı məhsullar istehsal edən ölkələrdən biridir: "Məsələ burasındadır ki, Azərbaycan rəqabət qabiliyyətli qiymətə məhsul istehsal edə bilərmi? Digər tərəfdən Azərbaycan nar ixracında üstünlüyə malikdir. Ölkədə istehsal olunan narlar keyfiyyətlidir və yaxşı qiymətədir".