Laqodexi şəhərinin meri: 20 Yanvar Azərbaycan xalqının müstəqillik uğrunda mübarizə əzmini daha da gücləndirdi

Qanlı Yanvar faciəsi Azərbaycan xalqının müstəqillik uğrunda mübarizə əzmini qırmağa yönəlmiş addım idi. Lakin imperiya qüvvələri və onların əlaltıları xalqın bu əzmini qıra bilmədilər. Əksinə, 20 Yanvar xalqın azadlıq ruhunu və mübarizə əzmini daha da gücləndirdi.
Bu sözləri jurnalistlərə müsahibəsində Gürcüstanın Laqodexi şəhərinin meri Condo Didiaşvili söyləyib.
Mer deyib: "Gürcü xalqı da 1989-cu il aprelin 9-da müstəqillik uğrunda mübarizədə qurbanlar verib. O vaxt azərbaycanlılar bizim səsimizə səs verdilər. Bu gün Laqodexidə 20 Yanvar faciəsi qurbanlarının xatirəsini andıq. Bu, bizim həmrəyliyimizdir. Eyni zamanda, qəhrəmanlarımızın əziz xatirəsi qarşısında borcumuzdur”.