“Azərbaycan-Gürcüstan arasında münasibətlərin inkişafında gənclərin rolu” mövzusunda konfrans keçirilib

Tiflisdə “Azərbaycan-Gürcüstan arasında münasibətlərin inkişafında gənclərin rolu” mövzusunda konfrans keçirilib. APA-nın Gürcüstan bürosunun məlumatına görə, tədbir İvane Cavaxişvili adına Tiflis Dövlət Universitetində (TDU) “Azərbaycanın Dostlar Klubu”nun və Azərbaycan “İslahatçı Gənclər” İctimai Birliyinin birgə təşkilatçılığı ilə keçirilib. Tədbirdə Azərbaycanın Xarici İşlər Nazirliyinin mətbuat xidmətinin rəhbəri Hikmət Hacıyev, politoloq Əhməd Şahidov, Azərbaycan səfirliyinin diplomatları, Gürcüstan və Azərbaycanı təmsil edən gənclər çıxış edərək hər iki ölkənin xalqları arasında birgə fəaliyyət göstərilməsinin vacibliyini vurğulayıblar.
Tədbirdə çıxış edən ekspertlər Gürcüstanla Azərbaycanı ortaq tarix, ortaq mədəniyyətlə yanaşı ortaq problemlər də birləşdirdiyini qeyd ediblər.
Konfransda Azərbaycan-Gürcüstan arasındakı münasibətlərin inkişafında mühüm xidmətlərinə görə TDU-nun azərbaycanlı tələbələri və fəal gənclər, həmçinin təcrübəli jurnalistlər “İslahatçı Gənclər” İctimai Birliyinin Fəxri Fərmanı ilə təltif olunublar. Konfransda Azərbaycanın əməkdar jurnalisti, APA-nın Gürcüstan müxbiri Nizami Məmmədzadə də Fəxri Fərmana layiq görülüb.