Çin səhraları günəş panelləri ilə örtməyə başlayıb

Çin ərazisində çoxlu böyük səhralar var. Yaşıl enerji istehsalı üçün səhralardan istifadə etmək qərarına gələn ölkə birinci mərhələni geridə qoyub. Çinin səhralarda ilk günəş və külək elektrik stansiyaları bu yaxınlarda fəaliyyətə başlayıb. Günəş panelləri və külək turbinləri olan yeni obyekt 1,5 milyon insanı elektrik enerjisi ilə təmin edəcək.
Günəş və külək enerjisi layihəsinin birinci mərhələsi Qobi səhrasının cənubunda yerləşən Tenqer səhrasında qurulub. “Chine Energy” şirkəti tərəfindən yaradılan qurğu 1 milyon kW gücə malikdir. Bu mühüm obyektin ildə 1,5 milyard kW saat enerji istehsal edəcəyi gözlənilir. Dəyəri 85 milyard yuan (12,28 milyard dollar) olan layihə başa çatdıqdan sonra onun ümumi gücü 13 milyon kW-a çatacaq.
Çin hökuməti 2021-ci ilin sonunda səhralarda bərpa olunan enerji layihəsinə başlayıb. Bununla bağlı böyük planları olan ölkə ümumilikdə 19 əyaləti əhatə edən quraq ərazilərdə 100 GW günəş və külək enerjisi qurğuları qurmağı planlaşdırır.