Azərbaycanda məktəbli intiharı: NAHAR ETMƏYƏ GETDİ, MEYİTİ TAPILDI

Bu gün Şabran rayonunda 6-cı sinif şagirdinin özünü öldürməsi hadisəsinin bəzi təfərrüatları məlum olub. Daşlıyataq kənd sakini olan və günorta saatlarında yaşadığı evin həyətində özünü asaraq intihar edən 2005-ci il təvəllüdü Mütəllimov Elnur Sahib oğlunun yaxınları bildiriblər ki, onun ailəsində heç bir problem olmayıb.
Bildirilib ki, Daşlıyataq kəndində orta məktəb 4 illik olduğundan o təhsilini Ağalıq kənd orta məktəbində davam etdirirmiş. Bu gün 12 yaşlı Elnur dərsə getməyib o, səhər saatlarında qoyunları otarmaq üçün sahəyə gedib. Günorta saatlarında isə Elnur növbəsini qardaşı ilə dəyişib və kəndə nahar etməyə gəlib. Həyətə daxil olan yeniyetmə ördəkləri yemlədikdən sonra tövləyə keçib və burada özünü asıb.
E.Mütəllimovun təhsil aldığı Ağalıq kənd orta məktəbinin direktoru Nazilə Camayeva Lent.az-a bildirib ki, həmin şagirdin qiymətləri orta olub və davamiyyətində ciddi problem olmayıb: “Çox tərbiyəli, məsuliyyətli şagird idi. Təlimi əla olmasa da, davranışları, psixoloji vəziyyəti yaxşı idi. Uşaqlarla dostluq edirdi, hamı ilə münasibət saxlayırdı”.
Faktla bağlı cinayət işi açılıb, araşdırmalar davam etdirilir.