Elcanın ölüm xəbəri təsdiqlənmədi - BAŞ HƏKİMDƏN AÇIQLAMA

Dünən Lerik rayonunun Orand kəndində baş vermiş qar uçqunu nəticəsində xəsarət alan 1 yaşlı Elcan Mustafayevin vəziyyəti normaldır. Bu barədə Lerik Mərkəzi Rayon Xəstəxanasının baş həkimi Mübariz Ağayev məlumat verib.
O bildirib ki, körpənin səhhətində ciddi problem müşahidə edilmir: "Elə indicə Elcanın yanından qalxıram, vəziyyəti normaldır. Yaxınları evə aparmaq istəsə də, hələlik buraxmadıq. Daxili orqanlarında, sümük sistemində patologiya yoxdur. Yalnız gicgah nahiyəsində hematoma var, o da sovrulmaqdadır. Yaxın günlərdə evə buraxılacaq".
Qeyd edək ki, məlum hadisə zamanı bir ailədən ikisi körpə olmaqla 4 nəfər vəfat edib. Bu gün isə telekanallardan biri xəstəxanaya yerləşdirilmiş Elcanın vəfat etməsi barədə xəbər yayıb. Baş həkim həmin xəbərin həqiqətə uyğun olmadığını bildirib.