Lənkərandakı kütləvi zəhərlənmənin səbəbi sabah bilinəcək

Səhiyyə Nazirliyi tərəfindən Lənkəranda baş verən kütləvi zəhərlənmə hadisəsinin səbəbinin müəyyənləşdirilməsi üçün aparılan analizin nəticələrinin sabah məlum olacağı gözlənilir.
Bunu Səhiyyə Nazirliyinin Gigiyena və Epidemiologiya Mərkəzinin Qidalanma gigiyenası bölməsinin müdiri İmran Abdullayev deyib.
Onun sözlərinə görə, ilkin ehtimallara əsasən, zəhərlənmə suyun çirklənməsi nəticəsində baş verib: “Lənkəran rayonunun Daşdatük kəndinin içməli su kimi istifadə edilən bulağına əlavə su xətti birləşdirilib. Həmin su mənbəyi isə bataqlıq sahədə açıq halda olub. Yağışlar yağdıqdan sonra sular bulanıb. Həmin sudan daha çox uşaqlar istifadə etdiyinə görə zəhərlənənlər arasında uşaqlar çoxluq təşkil edir”.
Qeyd edək ki, suyun qəbulu nəticəsində 50-dən çox şəxs zəhərlənib. Onların çoxu uşaqlar olub.