Boris Consonun çıxışlarından qazandığı gəliri açıqlanıb

“Sky News” məlumat verir ki, Böyük Britaniyanın keçmiş Baş naziri Boris Conson vəzifədən getdikdən sonra çıxışları sayəsində üç ay ərzində 1 milyon funt-sterlinqdən (1,2 milyon dollardan çox) çox pul qazanıb.
Conson noyabrda Amerika “Centerview Partners” investisiya şirkəti, “Hindustan Times” qəzeti və Lissabonda CNN telekanalının beynəlxalq sammitində üç çıxışı üçün qonorar olaraq 750 min funt-sterlinqdən çox pul alıb.
Oktyabr ayında o, CIAB (Sığorta Agentləri və Brokerləri Şurası) konfransında yarım saatlıq çıxışına görə isə təxminən 276 min funt-sterlinq qonorar əldə edib.
Xatırladaq ki, Conson iyulun 7-də Böyük Britaniyanın Baş naziri və Mühafizəkarlar Partiyasının rəhbəri vəzifəsindən istefa verdiyini açıqlayıb.