Azərbaycan rəssamları “İqlim dəyişikliyi” mövzusunda seminar keçiriblər

“Fabrika” qalereyasında “İqlim dəyişikliyi” mövzusunda rəssamların seminarı keçirilib. Tədbir “Arts Council Azerbaijan” QHT-nin dəstəyi ilə Avropa İttifaqının Azərbaycandakı Nümayəndəliyi tərəfindən təşkil olunan “FantazEU 2024” mədəni irs festivalının bir hissəsi oldu.
Seminarda istedadlı rəssamlar bir araya gəliblər. Onların əsərləri iqlim dəyişikliyi mövzularının bənzərsiz bədii interpretasiyalarını təcəssüm etdirib.
Hər bir əsər müxtəlif perspektivləri və bədii yanaşmaları təmsil edərək, müəllifin iqlim dəyişmələrinin ətraf mühitə və bəşəriyyətə təsiri ilə bağlı şəxsi baxışını nümayiş etdirirdi. Bu seminar Azərbaycanda mədəni mübadiləni gücləndirmək və incəsənət vasitəsilə Avropa irsini təbliğ etmək üçün mühüm təşəbbüsə çevrilib.
“FantazEU 2024” festivalı mədəni üfüqləri genişləndirmək, mədəniyyətlərarası dialoqu qorumaq və Avropa ilə Azərbaycan arasında əlaqələri gücləndirmək missiyasını davam etdirir. Bu cür tədbirlər vasitəsilə festival mədəni əməkdaşlığı təşviq edir, mədəni və təbii irsin qorunmasının əhəmiyyəti haqqında məlumatlandırır.