Baş prokuror: Azərbaycan ilə Çinin prokurorluq orqanları arasında əməkdaşlığın daha da möhkəmlənəcəyinə ümid edirik

Çinli həmkarlarımızı Azərbaycanda görməkdən çox məmnunam. Əlbəttə, Azərbaycan və Çin bir çox ortaq cəhətlərə malikdirlər. Ölkələrimizin liderlərinin səyləri nəticəsində bu gün Azərbaycan ilə Çin strateji tərəfdaşdır. Bu, çox mühüm məsələdir.

Bu sözləri Azərbaycan Respublikasının Baş prokuroru Kamran Əliyev avqustun 31-də Baş Prokurorluqda Çin Xalq Respublikasının Ali Xalq Prokurorluğunun yüksək vəzifəli şəxslərdən ibarət nümayəndə heyəti ilə görüşdə deyib.

Baş prokuror qeyd edib ki, iki ölkənin prokurorluq xidmətləri arasında sıx münasibətlərin qurulması və əməkdaşlığın inkişaf etdirilməsi olduqca vacibdir.

O, Azərbaycan Respublikasının Baş Prokurorluğu ilə Çin Xalq Respublikasının Ali Xalq Prokurorluğu arasında Anlaşma Memorandumunun imzalanmasını yüksək dəyərləndirərək deyib: “Biz prokurorluq orqanları arasında əməkdaşlığın bundan sonra daha da möhkəmlənəcəyinə ümid edirik”.