Ərdoğan BMT Təhlükəsizlik Şurasında islahatlara ehtiyac olduğunu bildirib

Türkiyə prezidenti Rəcəb Tayyib Ərdoğan BMT sistemində islahatların aparılmasının vacibliyini bir daha bəyan edib.
Bu barədə Türkiyə prezidenti hakim Ədalət və İnkişaf Partiyasının (AKP) Ankaradakı qərargahında iftar mərasiminin sonunda deyib.
"Bəşəriyyətin taleyini cəmi 5 ölkənin həll etdiyi dünya nizamı acizdir. BMT Şurasının hərtərəfli islahatına təcili ehtiyac var", - deyə R.T.Ərdoğan qeyd edib.
Ukrayna böhranının həlli perspektivlərinə toxunan dövlət başçısı Rusiya ilə Ukrayna arasında ədalətli sülhün bərqərar olmasının mümkünlüyünə əminliyini ifadə edib.
Onun sözlərinə görə, bu məqsədə nail olunması “tərəflərə indiki vəziyyətdən layiqli çıxış yolu təqdim edəcək və regionu cəlb olunduğu burulğandan çıxaracaq”.
Türkiyə prezidenti müsəlmanların müqəddəs kitabı - Qurana qarşı bir sıra ölkələrdə baş verən təxribatlara da münasibət bildirib.
"Quranın yandırılması da daxil olmaqla, mənfur təxribatlar heç bir halda qəbuledilməzdir və heç bir bəraət qazandıra bilməz", - deyə o bildirib.
R.T.Ərdoğan bu cür hərəkətlərin “aydın və birmənalı olaraq nifrət zəminində cinayətlər” olduğunu vurğulayıb.